जिज्ञासापुरुष ह्युएनत्संग

लहानपणापासून अभ्यासक्रमात चिनी प्रवाशांच्या भारतातील प्रवासाचे वर्णन वाचत आलो होतो. फाहियान, ह्युएन-त्संग आणि इत्सिंग या तीन प्रवाशांच्या प्रवासाची विशेष वर्णने पुनःपुन्हा वाचायला मिळत असत. त्या तिघांपैकी ह्युएन-त्संग यांचे प्रवासवर्णनच सर्वांत अधिक महत्त्वाचे मानले जात असे. त्या काळापासूनच ह्युएन- त्संग यांच्या चरित्राविषयी एक कुतूहलाची आणि आदराचीही भावना मनात निर्माण झालेली होती. विशिष्ट उद्दिष्टासाठी एखादा मनुष्य अखंडपणे किती प्रयत्न करू शकतो, याविषयीचा एक मार्गदर्शक आदर्श त्यांच्या चरित्रातून मिळत असे.